На 17 октомври се одбележува и Меѓународниот ден за борба против сиромаштијата.  Во рамките на одбележувањето на овој ден, со поддршка на Претседателот на Република Северна Македонија, Стево Пендаровски и членовите на неговиот кабинет, со одобрение и поддршка од Општина Куманово, во соработка со членовите на Коалицијата за борба против гладта и фрлање храна-“Банка за храна МК”, Националниот ромски центар-Куманово, “Пако Мак”-Скопје, неколку приватни фирми од нашиот град, во Куманово беа доделени 100 прехранбени пакети на социјално загрозени семејства од сите етнички заедници.

На настанот, кој се одржа во просториите на Комитет-Куманово, присуствуваше Секретарот на Општина Куманово, Десанка Стошевска, која покрај членовите на Коалицијата за борба против гладта и Националниот ромски центар, им се обрати на присутните и заедно ги доделија пакетите.

Денеска Здружената Оперативна Команда свечено го одбележа 17 октомври. На свеченоста по повод овој значаен датум, во касарната “Боро Менков”-Куманово, присуствуваше Градоначалникот на Општина Куманово, Максим Димитриевски, каде пригодно со сите почести беа пречекани Претседателот на Република Северна Македонија и Врховен командант на АРМ, Стево Пендаровски и Министерката за одбрана на Република Северна Македонија, Радмила Шекеринска. На свечениот чин, присутните ги поздрави и им се обрати генерал-мајор Павле Арсоски.

На Градоначалникот Димитриевски му беше врачена Голема плакета на Армијата на Република Северна Македонија за соработка и врвни постигања, како највисоко признание на надворешен субјект.

Од бројните културни настани во рамките на одбележувањето на Јубилејот 500 години Куманово, во Занаетчискиот дом во нашиот град се одржа промоција на документарниот филм за СОУ Гимназија “Гоце Делчев”-Куманово, чиј покровител е училиштето.  На настанот присуствуваше Градоначалникот на Општина Куманово Максим Димитриевски, кој покрај останатите говорници, има свое обраќање во документарниот филм и претседателот на Советот на Општина Куманово Атина Мургашанска.

Документарниот филм за СОУ Гимназија “Гоце Делчев” го претставува развојот на училиштето и тоа од неговото формирање, во далечната 1945 година, па се до денеска. Претставен е хронолошкиот процес со сите фази на градењето на  училиштето: ученици и професори, кои се дел од изградбата, создавање на првата учителска школа, на кој начин се одвивал и градел образовниот процес, застапени се и обраќањата на поранешни професори и директори на СОУ Гимназија “Гоце Делчев”-Куманово.

Културниот настан го збогатија и ученици од Гимназијата со неколку музички точки, како дел од кратката културно-уметничка програма.

Автор на документарниот филм е нашиот познат спортски новинар Марјан Стошевски, а во улога на модератор беше проф. д-р Маја Јакимовска Тошиќ.

По повод Меѓународниот ден на слепите лица (Меѓународен ден на белиот стап), а во рамките на проектот “Заедно посилни за подобар живот”, чиј носител е Здружението на слепи лица од Општина Штип, во ресторан Грација-Куманово, се одржа отворена дискусија на тема “Како да ги решиме инфраструктурните проблеми со кои се соочуваат лицата со попреченост во локалните заедници”. Оваа конференција беше средба на членовите на Здружението на слепи лица и претставниците од локалната самоуправа, со цел да се потенцираат бариерите, со кои се соочуваат слепите лица во сите сфери од секојдневното живеење, а акцент беше ставен на инфраструктурните проблеми.

На настанот присуствуваше претседателот на Совет на Општина Куманово, Атина Мургашанска, која имаше свое обраќање, истакнувајќи ги видувањата за оваа проблематика, со цел да се пронајде решение за секојдневно делување на слепите лица, за да можат на полесен начин да дојдат до сите институции, да ги добијат потребните информации и да функционираат без бариери и потешкотии.

Делегација од Општина Куманово, предводена од Градоначалникот Максим Димитриевски денеска присуствуваа на одбележувањето на патронатот на касарната “Боро Менков”-Куманово. Во чест на пожртвуваноста на народниот херој Боро Менков, беше положено свежо цвеќе на неговата биста, оддавајќи му посебен пиетет за заслугите за доброто на својот народ.

Командантот на 1.механизиран пешадиски баталјон, потполковник Стојанче Костов, со пригоден збор за оваа прилика им се обрати на присутните, потенцирајќи го огромното значење на ликот и делото на Боро Менков, кој остави неизбришлива трага во македонската историја. Се одржа и кратка културно-уметничка програма, во прилог на настанот.

Под мотото “Радоста и надежта-во сите нас”, денеска ООУ “Магдалена Антова”-Куманово го одбележа патрониот празник, на кој присуствуваше Делегација од Општина Куманово, предводена од Секретарот на Општината и претставници од Секторот за образование при Општина Куманово. Во рамките на одбележувањето се одржаа Свечена седница и Свечена сценска изведба, подготвена од страна на наставниот кадар и учениците.

По три дена натпревари на тениските терени кај Спортската Сала во Куманово , заврши Отвореното тениско првенство за тенисери и тенисерки до 14 години . Во категоријата на момчиња до 14 години триумфираше Амар Хусеиновиќ од Т.К.МТП од Скопје,додека кај девојчињата победи Ана Стојановска од Т.К Охрид . Турнирот беше организиран од Т.К.ТУМБА и од Сојузот на Спортови на град Куманово. Сите три дена поминаа во фер и коректна атмосфера и одиграни квалитетни натпревари на идните тениски звезди.

По повод одбележување на јубилејот 500 години Куманово се одржа Меѓународен атлетски митинг ” 11 Октомври” на Атлетската патека во Соколана со богата програма на атлетски дисциплини. Учество зедоа повеќе клубови од Република Северна Македонија и атлетичари/ки од Бугарија. Ччесниците се натпреваруваа во 17 дисциплини, почнувајќи од најмладите до сениорите, но и за рекреативците. Школската програма имаше над 100 дечиња, а во атлетската околу 50 учесници.

Делегација од Општина Куманово, предводена од Градоначалникот Максим Димитриевски и Премиерот на Република Северна Македонија Зоран Заев, денеска ја посетија индустриската зона во м.в.Новини, с.Речица.Градоначалникот Димитриевски, на стопанствениците од Општина Куманово им ги претстави замислата и предностите кои се добиваатсо реализирањето на овој значаен проект, како нови можности, кои ќе донесат и нови вработувања за граѓаните. Се потенцираше дека ова е најголема индустриска зона во Општина Куманово, која ќе се развива со сопствени средства и поддршка од Владата на Р.С.Македонија и која ќе привлече голем број на фирми, преку развивање на големи трговски единици.

Премиерот Заев им се обрати на присутните, со цел да ги претстави и потенцира идеите и намерите од страна на Владата на Република Северна Македонија,за оваа индустриска зона, како голем потенцијал, кој ќе донесе поволностиза граѓаните.Беше истакната поддршката од државата за Куманово, со повикување на стопанствениците да инвестираат на оваа локација,од причина што стопанството е една од најзначајните гранки за развивање и просперитет на нашите граѓани.

Како уште еден културен настан во низата од настани по повод 11 Октомври, се одржа промоција на видео записот за песната “Прошета се Јовка Кумановка”, како преработка на оваа извонредна нумера од страна на познатата македонска група “Next time”, во организација на Фондацијата за култура и спорт-.Куманово. На промоцијата, продуцентите на преработката и пејачите на љубопитната публика им ја пренесоа приказната за настанувањето на ова прекрасно дело, а членовите на групата се претставија со уште неколку преработки на познати македонски песни.