По огромниот успех кој го постигнаа годинава освојувајќи го Купот на Македонија, ракометарките на ЖРК Куманово денеска се сретнаа со градоначалникот Максим Димитриевски.

На средбата, градоначалникот Димитриевски им се заблагодари за посветеноста и за постигнатиот успех, истакнувајќи дека се чест и гордост за нашиот град и им порача дека Општина Куманово ќе продолжи да дава поддршка на спортот во Куманово. Градоначалникот се заблагодари и на тренерот и екипата која со своите амбиции придонесуваат Куманово заслужено да ја носи титулата Град на спортот за 2019 година.

ЖРК Куманово во моментов е прв на табелата и се надева на освојување на првенството.

Градоначалникот Максим Димитриевски денеска оствари работна средба со Амбасадорот на Република Словенија во Република Северна Македонија Н.Е. Милан Јазбец. На средбата се разговараше за досегашната меѓуопштинска соработка на Куманово со општините од Република Словенија, за економијата и за образованието. Градоначалникот Димитриевски го претстави профилот и развојните можности на општината кои отвораат нови перспективи за идна соработка, особено на полето на инвестициите кои може да произлезат од индустриските капацитети на општина Куманово.

Амбасадорот Јазбец истакна дека постојат повеќе можности за соработка во образованието, во инфраструктурата и економијата, посочувајќи ја идеалната местоположба на Куманово и веќе воспоставената соработка со Општина Марибор, со која Општина Куманово има потпишано меморандум за соработка.

Претходно, Амбасадорот Јазбец во рамки на кампањата „ЕУ за тебе“ со Патувачкиот автобус на ЕУ  ја посети Гимназијата „Гоце Делчев“ каде што присуствуваше на повеќе активности и учествуваше на дебата со учениците насловена како „Визијата на младите за Европската Унија“.

Во организација на Општина Куманово и Младински Исламски Форум, на градскиот плоштад во Куманово, вечерва се одржа заеднички Ифтар. На настанот присуствуваше градоначалникот Максим Димитриевски, претставници од централната и локалната власт, теолози, претставници на невладини организации и граѓани. Народниот ифтар се одржува неколку години наназад, а вклучува заедничка вечера која оваа година започна во 19 часот и 58 минути.

Градоначалникот Максим Димитриевски годинава е учесник и панелист на дванаесеттиот Економски Форум кој се одржува во Астана – Република Казахстан. Економскиот Форум во Астана е една од највлијателните интернационални платформи за дискусија за подигнување и развој на глобалната економија и финансискиот систем. Под слоганот “Инспиративен раст: луѓе, градови и економии”, оваа година на форумот учествуваа политичари и бизнисмени од целиот свет.

Во рамки на посетата, градоначалникот Димитриевски оствари повеќе средби со претставници од бизнис заедницата, меѓу кои и со заменик претседателот на здружението на стопанските комори на градот Астана, г-дин Данијар Садиков. На средбата, заедно со в.д. амбасадорот на Република Северна Македонија во Казахтан н.е. Муарем Неџити, беше направена презентација за Општина Куманово и новата развојна индустриска зона “Новини и Речица”, која беше презентирана и понудена за инвестиции на потенцијални инвеститори од оваа држава, кои покажаа голем интерес и најавија скорешна посета на нашиот град.

Општина Куманово заедно со Владата на Република Северна Македонија следниот месец отпочнува со инвестиции во инфраструктура во новата индустриска зона “Новини и Речица” во Куманово. Индустриската зона е лоцирана на коридорот 8, автопатот е75 „Пријателство“, на 5км до границата со Србија. Оваа зона со својот капацитет од над 50 инвестиции со различна големина на парцели, урбанистички уредени за лесна и незагадувачка индустрија, трговски единици и сместувачки капацитети, поради својата атрактивна локација е предмет на интерес на голем број како домашни така и странски компании.

Претседателот на Советот на Општина Куманово Атина Мургашанска, денеска свечено ја отвори манифестацијата по повод Меѓународниот ден на музеите – 18 мај. Манифестацијата е во организација на НУ Музеј Куманово кој беше домаќин на прославата и советувањето на тема „Музеите како културни средишта, иднината на традицијата“.

Денеска во ООУ „Крсте Мисирков“ се одржа „Детски семафор“ – натпревар од областа на сообраќајот за учениците од основните училишта и натпреварот „Сообраќајна техничка култура на млади“ за учениците од средните училишта.

Натпреварите се во организација на Општинскиот совет за безбедност во сообраќајот на патиштата, Секторот за превенција при СВР Куманово и Општина Куманово.

Ученици и наставници од училишта од  Франција, Шпанија, Португалија, Италија и Романија, заедно со учениците и наставниците од ООУ „Кочо Рацин“, денеска ја посетија Општина Куманово и остварија средба со Градоначалникот Максим Димитриевски.

На средбата беше претставен проектот GOAL! – Учиме преку игри во рамките на програмата Еразмус +, кој се реализира од септември 2018 до август 2020 година, а чиј домаќин деновиве е кумановското основно училиште „Кочо Рацин“.

Градоначалникот Димитриевски ја поздрави иницијативата за размена на едукативни искуства, што придонесува кон подобрување на образовниот процес, ја истакна важноста од  развивање на тимската работа но, и можноста за запознавање на културите и знаменитостите на учесниците и нивните држави.

Учениците и професорите, гости од Еразмус + имаа можност да се запознаат со Куманово и неговата демогеографија и историја, а во наредните денови ќе посетат знаменитости  во градот и околината.

На градскиот плоштад во Куманово денес се одржа традиционалниот маскенбал „Батко Ѓорѓија“ 2019. Настанот е дел од годишната програма за културни манифестации на општината која оваа година прославува 500 години постоење, а се реализира под покровителство на Градоначалникот и Советот на Општина Куманово и Фондација за култура и спорт на Општина Куманово. Пред многубројната публика продефилираа околу четириесет поединечни и групни маски со околу 1200 учесници.

На овогодинешниот маскенбал учествуваа сите детски градинки, основни и средни училишта, како и поединци , а гости со ревијално учество беа неколку маски од Струмичкиот карневал. Настанот беше проследен со богата културно-уметничка програма.